ਟਾਇਮ ਸੁਕੇਅਰ

ਯਾਤਰਾਵਾਂ ਦਾ ਆਪਣਾ ਮੁਹਾਵਰਾ ਹੁੰਦਾ ਹੈ ਕੁਝ ਅੰਦਰੂਨੀ ਹੁੰਦੀਆਂ ਹਨ ਕੁਝ ਬਾਹਰਲੀਆਂ ਅਤੇ ਬੈਰੂਨੀ ਹੁੰਦੀਆਂ ਹਨ ਕੁਝ ਬਾਹਰੋਂ ਅੰਦਰ ਵੱਲ ਆਉਂਦੀਆਂ ਹਨ ਕੁਝ ਅੰਦਰੋਂ ਬਾਹਰ ਵੱਲ ਜਾਂਦੀਆਂ ਹਨ

ਟਾਇਮ ਸੁਕੇਅਰ ਦੇ ਛੱਤੇ ਵਿਚ ਸ਼ਹਿਦ ਦੀਆਂ ਮੱਖੀਆਂ ਵਾਂਗ ਹਰ ਮਨੁੱਖ ਦਾ ਆਪਣਾ ਕੋਈ ਕੂਬੀਕਲ ਹੈ ਜਿਹੜੇ ਵੀ ਪੈਰ ਪਰ ਬਣ ਕੇ ਸ਼ਹਿਦ ਦੀ ਭਾਲ ਵਿਚ ਇੱਧਰ ਉੱਧਰ ਉੜੇ ਉਹ ਰੁੰਡਮਰੁਡ ਹੋ ਕੇ ਹੀ ਮੁੜੇ

ਇਥੇ ਸੂਰਜ ਕੁਝ ਇਮਾਰਤਾਂ ਦੇ ਹਿੱਸੇ ਹੀ ਆਇਆ ਹੈ ਨੀਵੇਂ ਲੋਕਾਂ ਨੂੰ ਤਾਂ ਦੂਜਿਆਂ ਦੀ ਉਚਾਈ ਦੇ ਭਾਰ ਥੱਲੇ ਹੀ ਮੁੜ੍ਹਕਾ ਆਇਆ ਹੈ ਕਾਰਾਂ ਇਥੇ ਨਾੜਾਂ ਵਿਚ ਖੂਨ ਵਿਚ ਨਾੜਾਂ ਵਾਂਗ ਦੌੜਦੀਆਂ ਹਨ ਇਥੇ ਪੁੱਤਰਾਂ ਨੂੰ ਕੇਵਲ ਰਬੜ ਦੇ ਖਿਡੌਣੇ ਵਾਲੀਆਂ ਮਾਵਾਂ ਹੀ ਔੜਦੀਆਂ ਹਨ

ਜਿੰਦਗੀ ਦੇ ਕਾਰੋਬਾਰ ਨਾਲ ਭਰੀਆਂ ਸਾਹੋ ਸਾਹ ਤੇ ਹਫੀਆਂ ਹੋਈਆਂ ਗਲੀਆਂ ਹੌਂਕਦੀਆਂ ਤਿਰਕਾਲ ਦੀਆਂ ਘੜੀਆਂ ਮੂੰਹ ਵਿਚੋਂ ਥਕਾਵਟ ਦੇ ਡਾਲਰ ਥੁੱਕਦੀਆਂ ਪਰੇਸ਼ਾਨ, ਬਿਗੜੀਆਂ ਹੋਈਆਂ , ਇੱਕੋ ਥਾਂ ਖੜੀਆਂ ਲਾਭਾਂ, ਅਵਾਜ਼ਾਂ, ਤੇ ਗਿਣਤੀਆਂ ਦੀਆਂ ਪੇਸ਼ੀਨਗੋਈਆਂ ਸ਼ੀਸ਼ੇ ਦੇ ਬੰਦ ਕਮਰੇ ਤੇ ਘੁੰਮਦੀਆਂ ਹੋਈਆਂ ਕੁਰਸੀਆਂ

ਟਾਇਮ ਸੁਕੇਅਰ! ਮਨੁੱਖ ਮਹਿਜ਼ ਐਕਟਰ ਹੈ ਹਰ ਐਕਟਰ ਦਾ ਆਪਣਾ ਥਿਏਟਰ ਹੈ ਇਥੇ ਹਰ ਕੋਈ ਆਪਣੇ ਵਕਤ ਦਾ ਖ਼ੁੱਦ ਵੇਟਰ ਹੈ ਗੁਜ਼ਰਿਆ ਵਕਤ ਖਾਤੀਆਂ ਵਿਚ ਜਮ੍ਹਾ ਰਾਸ਼ੀ ਹੈ ਬਿੱਲ ਤਾਂ ਤਾਜ਼ਾ ਹਨ ਪਰ ਡਿੱਸ਼ ਬਾਸੀ ਹੈ

ਸੀੜੀਆਂ ਹਨ, ਬਾਲਕੋਨੀਆਂ ਅਤੇ ਐਕਸਲੇਟਰ ਹਨ ਗਦੇਲੇ ਹਨ, ਬਿਸਤਰੇ ਹਨ ਕੁਝ ਉਖੜੇ ਸਾਹ ਲੇਟੇ ਹਨ ਹੰਕਾਰ ਨਾਲ ਆਕੜੀਆਂ ਹੋਈਆਂ ਗਰਦਨਾਂ ਹਨ ਬੰਦ ਕਮਰੇ ਵਿਚ ਕਿਸੇ ਕੁੜੀ ਦੇ ਸਾਹ ਲੈਂਦੇ ਲਾਕਟ ਹਨ

ਟਾਇਮ ਸੁਕੇਅਰ ਅਮਰੀਕਾ ਦੇ ਹਿਰਨ ਦੀ ਨਾਭੀ ਹੈ ਸਭ ਕੁਝ ਨੂੰ ਖੋਲ੍ਹਣ ਅਤੇ ਬੰਦ ਕਰਨ ਦੀ ਚਾਬੀ ਹੈ

ਐਵੇਨੂਆਂ ਅਤੇ ਸਟਰੀਟਾਂ ਵਿਚ ਘੁੰਮਦਾ ਮੈਂ ਅੱਕ ਗਿਆ ਹਾਂ ਅਤੇ ਵਕਤ ਦੇ ਦੂਰ ਅੰਦਰ ਹੀ ਕਿਧਰੇ ਧੱਸ ਗਿਆ ਹਾਂ ਮੈਂ ਅਜ ਦੀ ਅਗ੍ਹੜ ਦੁਗੜ੍ਹੀ ਸ਼ਾਮ ਵਿਚ ਫਸ ਗਿਆ ਹਾਂ ਇਥੋਂ ਮੈਂ ਲੇਟੀ ਹੋਈ ਬੇਅਰਾਮੀ ਨੂੰ ਖੂਬ ਪੜ੍ਹ ਸਕਦਾ ਹਾਂ ਮੁਹੱਬਤ ਨੂੰ ਕਮੀਜ਼ ਵਾਂਗ ਪਹਿਨ ਅਤੇ ਲਾਹ ਸਕਦਾ ਹਾਂ ਆਪਣੇ ਆਪ ਨੂੰ ਜਿੰਨੀ ਵੇਰ ਚਾਹਾਂ ਲੱਭ ਅਤੇ ਗੁਆ ਸਕਦਾ ਹਾਂ

ਨਿੱਕੇ ਪਰਸਾਂ ਨੂੰ ਘੁਮਾਉਂਦੀਆਂ ਹਨ ਦਫ਼ਤਰਾਂ ਤੋਂ ਸਾਬਣ ਦੇ ਬੁਲਬੁਲਿਆਂ ਵਾਂਗ ਬਾਹਰ ਨਿਕਲਦੀਆਂ ਕੁੜੀਆਂ ਹੁਣ ਆਪਣੇ ਘਰਾਂ ਨੂੰ ਜਾਂਦੀਆਂ ਹਨ ਟਾਇਮ ਸੁਕੇਅਰ ਵਿਚ ਸਿਮਰਤੀਆਂ ਦੀਆਂ ਛਿੱਲਤਾਂ ਲਾਹੁੰਦਾ ਮੈਂ ਦੂਰ ਖਿਸਕ ਜਾਂਦਾ ਹਾਂ ਤੇ ਆਪਣੇ ਪਿੰਡ ਦੇ ਛੱਪੜ ਕੋਲ ਪਹੁੰਚ ਜਾਂਦਾ ਹਾਂ ਬੂਰ ਨਾਲ ਭਰੇ ਇਸ ਛੱਪੜ ਵਿਚ ਬੰਦਾ ਤਾਂ ਕੀ ਪਸ਼ੂ ਵੀ ਨਹੀਂ ਸੀ ਨਹਾਉਂਦਾ ਇਹ ਤਾਂ ਬਸ ਸਣ ਦੱਬ ਕੇ ਉਸ ਨੂੰ ਭੁੱਲ ਜਾਣ ਦੇ ਕੰਮ ਸੀ ਆਉਂਦਾ

ਦੱਬੀ ਹੋਈ ਸਣ ਦੀ ਹਬਕ ਨਾਲ ਮੈਂ ਮੁੜ ਟਾਇਮ ਸੁਕੇਅਰ ਅੰਦਰ ਬੜਦਾ ਹਾਂ ਗਲੀ ਨੰਬਰ 160 ਵਿਚੋਂ ਘੁੰਮਦਾ ਹੋਇਆ ਸ਼ਹਿਰ ਵਿਚ ਜਿੰਦਗੀ ਦੇ ਗੁੰਮ ਹੋ ਜਾਣ ਦੀ ਖ਼ਬਰ ਪੜ੍ਹਦਾ ਹਾਂ

ਆਪਣੇ ਵਾਂਗ ਆਪ ਮੁਹਾਰਾ ਘੁੰਮਦੇ ਬੰਦਿਆਂ ਨਾਲ ਕਦੇ ਇਥੇ ਅਤੇ ਕਦੇ ਉਥੇ ਖੜ੍ਹਦਾ ਹਾਂ ਤੇ ਫਿਰ ਹਿਫਾਜ਼ਤੀ ਜਿਹੀ ਕਾਹਲ ਨਾਲ ਕੁਈਨਜ਼ ਦੀ ਬੱਸ ਪਕੜਦਾ ਹਾਂ ਮਨਹਟਨ ( ਅਮਰੀਕਾ)